中環出更:波叔接波手軟 話處理唔容易

明年二月政府將公布新一份財政預算案,各界又開始爭取對自己有利嘅派糖措施。財政司司長陳茂波(波叔)尋日出席一個活動時,預告將會喺精英運動員發展基金加碼,但未有透露金額。佢又喺社交網站話,最近無論係見到朋友抑或喺街上遇見市民,大家總愛同佢講:「交個波畀你啦!」有朋友笑住問佢,咁多人交波,點樣處理好呢?佢就自認唔容易處理喎!

指資源有限 冇完美方案

最近電視機不停播放一條徵求市民對財政預算意見嘅宣傳片,唔少市民拎住個白色波波,好以許願咁寫低自己想要乜嘢糖,難怪咁多人想拋個波畀波叔喇!

波叔又喺網誌話,近月已舉行多場預算案諮詢會,亦已透過電郵、社交平台等,收到數百名市民意見。唔少意見希望調整部分措施,惟資源有限,亦沒有完美方案。以近期對差餉寬免應否加設限制嘅討論為例,有人支持亦有人反對,取態「南轅北轍」。

對於早前有消息稱,今個財政年度盈餘較上一年度大減三分之二,波叔尋日只係輕描淡寫話,保證今個財政年度一定有盈餘,明年會繼續努力喎!

卓妮

第一手消息請下載on.cc東網iPhone/iPad/Android/Windows Phone Apps