政情：八網難逃：元朗行街市 黃家和掃薑蒜返法國
香港餐飲聯業協會會長黃家和（Simon）日前擺咗張「打卡相」上Facebook，相中嘅佢手上抽住好多嘢，包括一袋乾腐竹，成個街坊咁，原來佢去咗元朗行街市，途中遇上政府推廣綠色旅遊嘅宣傳車，於是打個卡攞埋免費環保袋喎。至於腐竹係打算用來煲糖水。咦？唔通元朗有隱世靚腐竹賣？
每星期去格價 生果醬料乜都買
Simon解釋，話自己好鍾意去元朗行街市，差唔多每個星期六、日都會去一轉，因為覺得當地好有人情味同親切感，而且仲可以順便睇埋啲食物價格，了解行情。至於平時買乜嘢多？佢就話通常買吓生果、醬料同雲吞，有時仲會特登去買生薑同蒜頭之類帶返法國，因為佢住喺法國自家酒莊，好難買生薑同蒜頭喎。