政情：陳岳鵬幫浴室搵防潮收音機

依家嘅科技日新月異，一部智能電話已經有齊晒聽歌、影相、打電話、上網等等嘅功能，但喺呢個智能電話主導嘅年代，政制及內地事務局前副局長陳岳鵬（Ronald）反而喺Facebook上搵防潮收音機，佢仲指明要喺浴室內用添！唔通佢沖涼時有聽收音機嘅習慣？

家陣有智能電話，其實可以用電話內嘅相關功能，Ronald喺Facebook問完之後，唔少朋友都即刻回應佢，唔止話佢知邊度有，仲幫佢搵埋地址，甚至話有需要嘅話可以幫佢搞掂添，認真唔話得！亦有朋友留言介紹喺浴室用嘅無線藍牙音響，仲提醒Ronald可以透過藍牙，接駁手提電話之後，就乜都播得喎。

唔少人依家會選擇以一部智能電話就「走天下」，點解Ronald仲會用收音機呢？有朋友都有同樣疑惑，佢就解釋話因為收音機平靚正，而且操作方便喎。不過話時話，唔少人都鍾意喺浴室一路沖涼一路唱歌，唔通Ronald買收音機係想跟住唱歌，唔走音？抑或係沖緊涼都要留意時事？