政情：白鴿搞國際事務 騸雞擺卿姐上枱
民主黨（白鴿黨）最近又再經歷一次退黨潮，喺人才凋零嘅情況下，唔少元老級要重出江湖擔任黨職務。白鴿黨前主席劉慧卿（卿姐）更被中委會「欽點」做黨內新設嘅國際事務委員會主席添。不過，聽聞係「老鴿」兼委員會副主席單仲偕（騸雞）出口，擺咗卿姐上枱，令班「乳鴿」唔敢爭。
白鴿黨今午同傳媒茶敍介紹國際事務委員會，卿姐作為主席，一開口唔係講期望，而係話「我都係被通知要做」，引來哄堂大笑。身兼黨紀律委員會委員嘅佢更戲言，可能要「紀吓」黨副主席，點解突然叫佢做。
未來路向 一頭問號
至於未來路向係乜？卿姐坦言「未開會，未傾喎」，但就督促黨嘅網頁同新聞稿都要行雙語制。黨副主席尹兆堅就解釋，因為以往卿姐做立法會議員，好多領事都同佢聯絡，而現任白鴿黨七位議員好似未能傳承到卿姐嘅人脈，各有各做，所以希望有個委員會做正式對口。
而喺茶敍尾聲，騸雞現身同傳媒打招呼，佢就話係自己喺中委會提出要搞個委員會，笑稱卿姐做主席負責講嘢，自己做副主席就負責做嘢，好好分工喎。