中環出更：四線齊冧罰得少 苦主梁美芬叫加倍
港鐵日前宣布就今年十月四線「齊冧」罰款八百萬港元，唔知你覺得夠唔夠？立法會議員梁美芬就話唔夠喇！佢尋日就喺Facebook拍咗段短片，自揭係四線「齊冧」嘅受害者，當日搭唔到車，佢惟有由太子行路去九龍塘。
現有罰款制度唔夠阻嚇力
行足兩個地鐵站都好甘喎，點解一定要行呢？佢話因為當日要返去開會，所以搞到好唔方便，佢認為四線「齊冧」對交通嘅影響實在太大，所以若然壞多過一條線，罰則就應該加倍。
佢仲話按目前嘅罰款計算方式，其實係冇足夠嘅阻嚇作用，認為應該檢討制度，將罰則加倍。跟住仲話市民最想見到嘅其實唔係港鐵被罰，而係喺事故發生嘅時候，可以做好啲應變措施，例如安排接駁巴士幫助疏導乘客。咁睇嚟如果港鐵唔做番好啲應變措施，就算罰幾多錢，市民都唔會覺得夠，事關條氣仲谷住谷住呀！
卓妮