中環出更：江明熙憶澳洲實習 幫俊男縫針好驚青
好多人覺得醫生高薪厚職，其實高人工背後都需要勇氣去面對解剖同病人嘅質疑o架！香港醫療專業人士協會（醫專會）創會主席江明熙早前出席醫專會十周年晚宴時，講起當年喺澳洲實習，有個病人跌傷咗下巴，要搵全醫院最叻嗰個醫生幫佢縫針同整容，自己當時好驚，但前輩就教路「你話畀佢聽，依家呢刻最叻嗰個人就係你」，江明熙膽粗粗照咁做，縫完針後，病人仲讚佢縫得幾靚添！
江明熙話當年仲好細個，遇到咁嘅事真係好驚，個病人仲要係俊男，都好怕之後會被病人「抽佢後腳」，但當年真係縫得幾靚，證明信心真係好重要。當日晚宴，佢仲特別請咗一班醫科生出席，其中包括首名喺歷屆文憑試中考獲九科5**嘅「終極狀元」黃子衡。黃子衡喺港大讀緊書，當然要問吓佢讀書讀成點啦，佢話唔難讀，只係多嘢讀，覺得最煩惱係讀經濟等通識科，因為以前冇乜讀過喎。
學解剖 徐德義大膽過同窗
講起讀醫，食物及衞生局副局長徐德義話當年六個人一張枱，解剖嗰陣佢係最唔驚嗰個，有個同枱同學夜晚夢見屍體起身，但嗰位同學依家都做咗醫生啦！原來徐德義都唔out，當晚同其他嘉賓一齊整手指心心影相，完全知道點整，仲教埋名醫梁智鴻整添！
好多人都以為男醫生一定有好多女護士爭，立法會衞生服務界議員李國麟就話「你搞錯咗啦，一個靚女護士周圍都有人圍住佢呀」，靚女護士唔着制服仲靚，好多人喺醫院門口等添，而醫生就冇乜靚仔，靚仔醫生一早結咗婚，話大家睇得電影太多喎。佢又講起讀護士時，一班得三、四個男仔，六十幾個女仔，不過自己一早喺外面被人mark咗，「我從來都唔睇森林嘅，我睇樹o架嘛」。對太太大派定心丸喎，認真識做。
卓妮