日前已有政界人士放風，話今年財政盈餘只有舊年嘅三分之一。話口未完，財爺陳茂波（波叔）尋日話預計印花稅較原先估計嘅一千億元為低，又話盈餘同佢之前預計嘅四百多億元差唔多，講到會唔會短期加稅，佢仲沉默咗幾秒話預算案公布嗰日先知。話時話，舊年逾一千三百億元盈餘，最初佢都係撳住荷包唔肯派糖，前車可鑑，難免令人懷疑佢又喺度做期望管理，想壓低市民對派糖嘅訴求，但呢啲財技做得多，市民都唔會信，只會當佢做戲啫！
