政情：邊境亂玩航拍 馮煒光畀人鬧
前特首辦新聞統籌專員馮煒光離開政府後做番財經公關，最近就熱衷於周圍去玩航拍，佢仲自爆，試過喺中國同尼泊爾邊境玩航拍，仲影到邊防設備，搞到被武警叫停，嚇到佢要急急刪片添。玩航拍都唔知碇，真係抵佢畀人鬧喇。
試過部機跌落湖邊同撞樹
馮最近將過去一年玩航拍影嘅相印製成座枱月曆送畀人，其中一張相係喺西藏珠穆朗瑪峰大本營影嘅絨布寺。佢憶述當日部航拍機一飛起，就有武警出嚟喝止，佢就拿拿臨畀片對方睇，原來真係影到少少邊防設備，所以要即刻刪除。好彩對方同意唔使刪除絨布寺嘅相片，所以佢都形容該相片係「劫後餘生證據」。
馮玩航拍都試過幾次甩轆，佢話有次影影吓部機顯示唔夠電，但因為當時技術未到家，無法喺斷電前收番，部機就跌咗喺新疆阿勒泰湖邊，佢驚到要打畀航拍公司問點算，之後畀錢人執番。而另一次就喺香港，掛住玩冇留神，點知飛咗去人哋屋企，最後仲撞樹添，搞到要漏夜搵拯救隊去救機。佢冇畀人投訴都真係執番身彩喇。