政情：聘酒店大廚 私院搞星級飯堂
私家醫院鬥住院服務好，仲鬥到入飯堂！養和醫院有「名菜」叉燒酥、煲仔飯，仁安醫院都有雲吞麵，黃竹坑港怡醫院都唔輸蝕，海南雞飯、肉骨茶同喇沙湯麵都係「招牌菜」。黃竹坑港怡醫院尋日搞聚餐歎「招牌菜」。唔係淨得醫院員工有得食，事關大約九個月前，醫院嘅餐廳拎咗食肆牌，街外人隨時可以入去試菜。
街外人都可隨時光顧
醫院營運總監邱家駿話醫院為咗有美食，試過派送醫院廚師去新加坡深造東南亞菜廚藝。唔單止咁，仲重金禮聘星級酒店廚師設計佳餚。港怡醫院飯堂嘅主廚盧國錦曾效力本港兩間酒店，聽見大家對食物讚不絕口，佢都笑瞇瞇叫大家其實冇病痛、唔使入醫院，都可以嚟食餐好！
邱家駿仲話曾經有個口腔顎骨有問題、無法正常進食嘅病人，心思思好想食海南雞飯，結果醫院幫佢打碎成「海南雞糊仔」，居然病人都話好食。佢又話早排鄰近有名校開家長會，都有唔少家長嚟飯堂幫襯，依家飯堂熱鬧咗好多！
至於醫院來年大計，就係計劃今年首季會喺中環嘅大廈加開綜合醫療診所，希望可以收更多新症之餘，亦方便病人去鄰近嘅市區覆診。