中環出更：屯門公園噪音未解決 張建宗現身遭踩場
旺角行人專用區因街頭表演引致噪音問題最終要「殺街」，但另一個熱門表演場地屯門公園嘅噪音問題就遲遲未解決。政務司司長張建宗（小肥張）尋日出席屯門公園共融遊樂場開幕典禮，就畀屯門區議員歐志遠帶埋街坊「踩場」，指屯門公園噪音問題已經存在十多年，幾度修例改善都搞唔掂，要求立例禁止表演者使用擴音器，佢哋仲大鬧政府官員尸位素餐，懶理噪音擾民。
小肥張尋日為典禮致詞時，示威者就喺場外用「大聲公」抗議，仲故意製造「滋滋」聲等尖聲音頻，干擾小肥張致詞。不過小肥張就完全唔理，只係提高咪高峰嘅音量繼續演講，歐見狀就即刻話：「依家我得一個大聲公你都頂唔順，屯門公園日日都有幾十個大聲公、擴音器，你叫市民點頂得順？」
張懶理請願 直行直過
警方其後上前調停，示威者亦都喺小肥張致詞完之後停止抗議，不過典禮結束後，示威者將請願信交畀小肥張時，小肥張就冇理到，直行直過就走。示威者惟有將封信交畀民政事務局局長劉江華。政府之前都有跟進旺角街頭表演噪音問題，今次小肥張就咁走咗去，唔通唔怕畀人質疑雙重標準？
卓妮