香港係美食天堂，香港人亦出名識飲識食，但凡美食佳餚節、美食嘉年華定必人頭湧湧，所以食物安全把關絕對唔可以馬虎，否則市民病從口入就手尾長。可惜吖，食安中心唔止抽驗求其，仲要玩大細超，喺官老爺眼中，市民健康到底有幾重要，唔使問都知。
嗱，早前審計署怒轟食安中心把關不力多宗罪，立法會政府帳目委員會尋日就召開公開聆訊，有議員質疑食安中心抽驗零售食物比例不平均，近五成樣本來自超市，喺街市抽驗嘅樣本就一成唔夠，擺明大細超，如果咁都唔係只保障較富裕階層，對基層市民則話之你，三歲細路仔都唔信喇。
當然喇，官老爺例牌死撐，話抽驗比例係根據統計數據制訂喎，又話超市貨值比其他場所多，加上市民喺超市買到監察計劃下覆蓋嘅食品可能性較大，總之就係藉口多多。不過可能見議員唔收貨啩，轉頭又話已將抽驗街市食物樣本比例略略提升，乜都係佢講晒。
即係咁，就算街市食物樣本抽驗比例提升咗，仍然落後超市條數一大截，食安中心作為政府部門，服務對象係全港市民，家陣嘅做法，只會令人覺得幫襯超市嘅有錢中產條命矜貴啲，去街市買餸嘅基層淪為次等公民，就算港府出名嫌貧愛富，都唔好做到咁出面吖。
話時話，食安中心成立十多年來，港人嘅食物安全唔見得有咩保障，無論係大閘蟹驗出含致癌物二噁英，定係台灣知名咖啡店出售嘅茉莉花茶被驗出含過量殺蟲劑，食安中心鑊鑊都係後知後覺，次次都係等到問題爆煲至亡羊補牢，都仲未計孔雀石綠魚、蘇丹紅禽蛋、塑化劑食品、過期肉、坑渠油等等，簡直鑊鑊新鮮鑊鑊甘，食安官僚有冇做好呢份工，心照喇。
唔係嚇你，連審計報告都點名鬧爆食安中心把關工作有等於冇，唔止空運進口食物嘅實物抽驗率低得驚人，八百幾箱貨只驗一箱，陸路又有運載高風險食物車輛喺邊境食品管制辦事處掂行掂過，海路進口食物更加只需自願申報就過骨。食安中心抽驗量小又兒戲，一味鬆章，下下講個「信」字，當中有冇不可告人嘅利益關係，好值得查個明白。到底有幾多問題食品流入香港兼上埋餐桌，真係冇人講得埋。
官僚靠得住，豬乸會上樹。食安中心既冇把好食物安全嗰一關，令食安制度形同虛設，化驗工作又一味歎慢板，隨時超過半年都未完成化驗一款送檢食品，簡直係好吃懶做嘅庸官人辦，市民靠呢個廢衙門看門口，真係自求多福好過。