政情：北上投資 高佩璇難忘住漏水屋
早年去內地做生意真係需要捱，早前喺一個活動上見到九龍婦女聯會首席會長鄭明明及榮譽會長高佩璇，兩人都係早一批北上投資嘅港商。高佩璇話早年去廣東西部嘅羅定市發展，當地比較落後，佢雖然住喺當地唯一嘅招待所，但窗門都關唔實，冬天有風會吹到好難瞓得着，落雨仲漏水漏到要搵水杯、臉盆裝住，至今諗起仍然好難忘。
佢又話，當年羅定只有爛廠房，要喺香港運埋縫紉車等工具上去，亦要喺香港請指導員到當地工作。捱咗好多年後，依家當地嘅製衣業發展得好好，所以佢好想同年輕人講，咁艱苦係好值得。
鄭明明怕瘦多過肥
鄭明明喺內地嘅美容事業發展唔錯，佢話因為自己好鍾意扮靚，覺得靚係人嘅天性，所以當年都決定喺上海開始賣產品，生意相當唔錯。鄭明明相當敬業樂業，例如佢好注重自己身形，咁多年嚟體重都維持喺四十六至五十公斤，不過佢怕瘦多過怕肥，笑稱如果太輕，會唔夠力工作喎！