政情：憑一頁紙 蕭偉強搵番半世紀前嘅自己
點樣搵番半世紀嘅回憶？就憑一頁紙。勞工及福利局前局長蕭偉強早前喺Facebook上載咗一張相，相中嘅一頁紙，令佢搵番五十年前嘅自己。事關呢頁紙係佢小學畢業時，即一九六八年寫喺同學仔本紀念冊嘅勉勵字句，仲附送一張佢嘅相添！
有網友讚佢嘅「金句」文采非凡，但佢就話天下文章一大抄，相信當年嘅自己都係咁做。由於呢頁紙相隔半世紀重現眼前，實在好有紀念價值，佢仲話要返爸媽故居嘗試搵番自己嗰本喎。咁呢頁紙點得嚟？佢隔咗一日先開估，原來係早前參加小學校友會活動後，同重遇嘅幾位好同學茶敍，細說當年，有個同學好有心思帶咗佢珍藏嘅紀念冊，於是蕭就把握機會影低自己留言嘅一頁。
字體退步咗 因電腦手機惹禍
佢仲話，諗唔到自己小學時嘅字體原來頗端正秀麗，依家反而退步咗，因為缺乏小時候嘅專注同耐心，仲有就係電腦同手機惹嘅禍喇！
