政情：民意難違港台千瘡百孔帳委會或徹查
上月底審計報告力數香港電台多宗罪，包括收視奇低、製作成本高、不斷「炒冷飯」重播節目等，所以立法會政府帳目委員會（帳委會）都有意調查港台，睇吓每年使逾十億元公帑嘅「糊塗帳」實情係點。雖然帳委會內的建制派同泛民主派對調查港台仍意見分歧甚至拉鋸角力，但據悉唔少議員、市民都希望帳委會徹查港台，照咁睇嚟目前情況對帳委會都帶來一定壓力，否則難以向市民納稅人交代。
現時帳委會內嘅建制派傾向調查港台筆糊塗帳，但泛民就比較關注警方嘅採購出咗咩問題，雖然帳委會原則上唔會設調查數量上限，可惜礙於人手同工作量，兩項調查只能活一項，所以雙方就此拉鋸角力，而尋日召開嘅帳委會會議閉門聆訊就邀請咗相關部門出席解畫，等該會委員多啲資料以衡量最應該調查邊個議題，下次會議作最後決定。
建制泛民爭論調查項目
現時帳委會共有七名委員，建制對泛民四比三，但在主席慣性唔投票情況下，就會演變成三比三嘅局面，所以要調查港台定係警方，確實係會爭持不下，呢個時候該會就會考慮埋其他因素，例如聆訊結果、政府意見等。不過，消息指外間對於要求帳委會調查港台嘅聲音較大，民意難違，若泛民爭取查警方，都算係高難度挑戰。
到底係咪真係需要查港台？睇番審計署報告，港台唔單止收視低、成本高、不斷重播，仲有營運表現欠佳、外購單一化而被指有合謀風險、極多合約僱員、節目質素低等多個問題，可謂千瘡百孔，而港台作為公營機構，每年大大話話使緊逾十億元公帑，衡工量值完全唔合格，係一筆不折不扣嘅「糊塗帳」，所以港台問題備受關注，絕對可以理解。
港台常用公帑唱衰政府
況且港台多年來被指「陰陽怪氣」、「煽風點火」、「低級趣味」，用納稅人錢唱衰政府，建制派及有關方面早就睇唔順眼，甚至有意見認為港台應該及早摺埋。審計署報告嘅批評都算係具公信力，相信泛民都唔敢話該署亂咁批評，如果港台真金不怕洪爐火，就唔怕帳委會查個水落石出，亦可以透過答辯向市民交代清楚。