中環出更：岑智明孖丁新豹遊日本參觀墳場
日本為香港人旅行熱門地，好似天文台台長岑智明早前都同香港歷史博物館前總館長丁新豹去關西玩咗一個星期，兩位旅伴尋日出席活動又見面，不約而同提起去日本時專程去睇墳場，到底有咩特別呢？
卓妮尋日喺衞奕信勳爵文物信託廿五周年誌慶典禮，見到岑智明同丁新豹親自上陣，帶領市民遊覽香港嘅古蹟，期間大講歷史。理事會成員陳蒨、受託人委員會成員陳正欣同施榮忻都有份出席，支持推廣保育本地人文遺產。
岑智明就話，今次去日本由丁新豹帶路，所以玩得非常放心，當中最得意係發現丁非常鍾意食甜品，而自己都係第一次帶冷帽食雪糕喇。講番今次行程，佢哋不約而同提到去日本行墳場，丁新豹就解釋，參觀嗰個墳場專門安葬外國人，平日唔會對外開放，所以夠特別。
岑智明就話，幾年前因為研究香港風災歷史而認識歷史專家，結果意外發掘自己對收藏嘅興趣，現時仲會上網買收藏品，有小部分會放喺天文台畀大家睇添！唔知遲啲天文台搞開放日時，市民有冇緣欣賞到呢？
陳正欣：跑馬地墳場有賴志願者修葺
至於陳正欣就因為參與信託工作多年而認識多咗香港歷史，咁啱佢又講起墳場。佢話揸車成日經過跑馬地墳場，留意到春秋二祭時無乜人前往拜祭，好冷清，但該墳場所葬嘅人士有份建設今日嘅香港，所以呢個墳場好有意義，呼籲大家平時要多留意身邊事物。佢仲話，墳場依家保養得宜，全賴一班年輕志願者非常有心，落力密密修葺墓碑咋。
卓妮