有人爬簷篷 有人除帽撈 街坊冷眼：金錢真萬惡

為覓靚位 鬧市狂奔

目擊者表示，當「雨鈔」從天而降時，有部分人指：「唓，都唔知係咪真，可能係假錢！」直至有人大嗌：「係真錢嚟呀！」隨即起哄尖叫，整條街上途人追着隨風飄揚鈔票爭奪，情景陷入瘋狂。有人拿着數百元「紅衫魚」途人笑說：「發達囉，真係有錢執呀！」有對夫婦叫嚷：「快手啲啦，唔係畀人執晒。」有撲空街坊呼喊：「喂！上面掟多啲落嚟呀。」只見近百人舉高雙手，不斷跳高以求快人一步抓到鈔票，亦有人急忙使出「法寶」，除下帽子「撲蝶式」撈錢，人人笑容滿臉。

期間，有市民不顧安危，隨着鈔票的飄揚向着人群中快速奔跑，左穿右插，以求覓得最有利位置執錢，但捱撞的人只好大叫：「睇住呀，小心人踩人呀。」亦有逾廿人爬上毗鄰的港鐵站出入口上蓋執錢，有人更忘我在上蓋邊緣不斷跳高，險象環生；而住在大廈低層單位住客，聞聲由寓所探頭張望，看見窗外簷篷有錢，竟冒險爬出簷篷檢拾十分「牙煙」。

衝出馬路 險象環生

有大批市民衝出馬路，司機響按提醒，部分司機得知天降橫財，亦加入執錢大軍，現場交通受阻場面混亂，直至警員到場，混亂場面才稍稍受控，惟事後仍有市民心存僥倖，在附近街道游走作地氈式搜索，連渠口都不放過，希望執多一張得一張。