中環出更:林偉喬叫錯「陳議員」馬逢國嬲爆即更正

體育、演藝、文化及出版界嘅立法會議員馬逢國已經做咗六年幾議員,同唔少高官交過手,點知尋日就發生一幕佢畀人認錯係「陳議員」嘅尷尬場面,搞到佢一臉不滿咁要「提醒」對方佢姓馬,究竟係邊個高官咁甩轆呢?咪就係今年七月先至上任嘅政府資訊科技總監林偉喬囉!佢即時知衰耍冧話︰「對唔住,馬議員!」

立法會資訊科技及廣播事務委員會尋日討論開放數據政策,馬逢國問政府要求轄下部門開放數據,有冇徵求公眾同業界嘅意見。林偉喬回答時就叫咗馬逢國做「陳議員」,搞到馬逢國喺林答完後,一臉不滿咁話︰「更正一下,我姓馬嘅!」

上任後第4次出席立會會議

翻查紀錄,呢次已經係林偉喬上任總監後第四次出席立法會會議,唔可以話係初哥。不過,原來緊接馬逢國提問嘅議員係金融界議員陳振英,唔知林偉喬係心急得滯,抑或仲係太過緊張,先至「錯把馮京當馬涼」呢?

卓妮

第一手消息請下載on.cc東網iPhone/iPad/Android/Windows Phone Apps