政情:買磚頭不如投資農地 江明熙:更有前途

買樓向來都係華人社會所鍾情嘅投資項目,不過香港醫療專業人士協會創會會長江明熙就話,大眾嘅健康意識日漸提高,與其重金買磚頭博升值,不如投資響農地,認為生產可持續食材應該會更有前途喎。

江話,目前逾半嘅疾病都係由飲食而起,不過依家關注健康嘅人愈來愈多,對健康有利嘅可持續飲食亦將大有市場,但由於符合冇農藥、冇基因改造嘅「七無」種植嘅農場唔多,導致可持續食材售價偏高。佢就認識一位喺元朗以自然農法耕種嘅業餘農友,日常提供約七成嘅蔬菜食用量。江喺品嘗鮮甜嘅農作物之餘,心感與其買樓投資,不如投資農地生產可持續食材仲好。

普及可持續食材意義較大

佢又話,華人都一窩蜂咁購買樓房投資,地產商為迎合大眾嘅投資需要,大量興建樓房,蠶食寶貴嘅農地,結果造成內地「鬼城」處處,所以佢就覺得,如果有餘錢,不妨投資農地以促進可持續食材嘅普及,對社會福祉而言會更有意義喎。

第一手消息請下載on.cc東網iPhone/iPad/Android/Windows Phone Apps