政情:甘文鋒土法防曬 自嘲「黃都面晒」

屯門區議員甘文鋒日前喺社交網站上載一張滿面搽咗黃泥咁嘅相,仲話自己「黃都面晒」,唔通佢受咗乜嘢打擊,搞到咁頹廢?原來佢只係喺緬甸旅行時,一試當地嘅土法防曬兼美容方法啫。

用完感覺塊面滑咗

甘文鋒最近同四十個街坊去緬甸玩咗五日,因為當日唔記得搽防曬乳,所以就同幾個團友問當地司機借用,司機就推介當地用樹汁磨成嘅土法防曬品,搽完乾咗就會變黃色,當地好多人搽完周街行。佢話,用完之後感覺塊面滑咗,玩完一日又真係冇曬傷,幾有效。不過佢就冇買返嚟用,怕搽完出街會有啲騎呢喎。

佢又話,今次去緬甸係因為當地正推動旅遊業,預料唔少內地旅行團會去觀光,所以想趁當地物價上升、旅客逼爆前去咗先。咁啱緬甸准許香港特區護照持有人落地免簽入境,令旅程更加方便,佢都大呼好彩。

第一手消息請下載on.cc東網iPhone/iPad/Android/Windows Phone Apps