中環出更：過路睇手機成隱患 梁青華冀自律避立例
依家人人都有手機，甚至機不離手，連行路都頭耷耷睇手機，真係危險。身兼香港交通安全隊副總監嘅香港鐘表業總會（總會）前主席梁青華（華哥），早前就講開交通安全問題，話近年邊行邊睇手機嘅意外頻生，成為馬路新隱患，外國已有城市立例規管行人過馬路時睇手機，不過佢就都係希望大家行路時自律啲，咁香港就唔使行到呢一步喇。
隨住高鐵及港珠澳大橋通車，為零售業界帶來商機，華哥就睇好市場，早前仲喺九龍開咗一家瑞士名錶專門店，佢仲趁機做善事，將花籃代金捐畀香港交通安全會，由香港交通安全隊總監洪為民代表接收大支票。華哥當日笑笑口話，依家手機功能愈嚟愈多，自己都避免唔到邊行邊睇手機訊息，好彩冇咩事發生。洪就話，因為使用手機而導致嘅意外真係愈嚟愈多，明白有時都避免唔到，例如使用導航功能，亦有好多的士司機用手機接柯打，擺四、五部手機喺車頭，佢搭親呢啲的士都好驚咁話。
當日到場嘅仲有總會永遠名譽會長孫秉樞、品牌老闆商建光、香港金銀首飾工商總會榮譽會長陳瑞群、總會前主席曾國雄（Jerry）及鄭樹勝等人。華哥笑稱該名錶品牌有六十三年歷史，同佢年紀一樣，真係有緣分。
曾國雄逾百隻錶藏夾萬
而Jerry話，佢收藏咗逾百隻錶，平時都係鎖喺夾萬，得閒先拎出嚟上吓鏈、欣賞吓。佢話啲錶嘅增值潛力都唔細，當年用一萬元買落某隻名錶，經過三十年已增值至三十幾萬元，回報都幾和味。而鄭都收藏咗幾十隻錶，佢笑笑口話做呢行咁耐，始終對錶有要求，佢收藏嘅原則唔係睇價錢，而係着重手工藝，所以最愛機械錶喇。
卓妮