港鐵沙中線工程剪鋼筋醜聞令社會震驚同關注，政府同港鐵終宣布於紅磡站兩層月台鑿開共八十處石屎作檢測，以檢查該站月台鋼筋與螺絲帽接駁情況。運輸及房屋局局長陳帆尋日出席立法會委員會會議交代情況，議員都鬧爆當局同港鐵拖延做檢測，而檢查位置亦太少，其中范國威更狠斥陳︰「有錯唔認、認又認得遲、遲又做唔好！」如果當局一早做好監督工作，就唔使依家嚟鑿石屎檢查，應該鑿開庸官個腦睇吓有冇事至真！
