古人話：「讀萬卷書不如行萬里路。」但係如果要小學生每日攀山越嶺返學，放學又要行成二十分鐘落山返屋企，咁就唔同講法嘞。偏偏港府規劃公屋配套失誤，新校舍落成時間表嚴重滯後不特止，仲要唔偏僻唔吊腳唔揀，官老爺咁樣玩殘小學生，係咪變態o架？
唔係講笑，沙田水泉澳邨雖然早喺二○一五年入伙，不過時至今日，社區配套設施依然係要乜無乜，公共交通天殘地缺，街市十室九空唔在講，最離譜嘅係，呢條住咗近三萬人嘅公共屋邨，有大約三千五百個小學適齡人口，不過邨內第一間小學最快要三年後先落成，距離入伙足足遲咗七年咁耐。正如有立法會議員鬧爆，港府揀喺山頂最高點嚟建校，唔止有違「就近入學」原則，沿途仲要冇瓦遮頭，學生好天曬、落雨淋，仲隨時要應付附近出沒嘅野豬添，堅離地港官選出堅離地校址，莘莘學子真係怎一個慘字了得。
話時話，港府興建公務員學院都不惜迫遷傷健人士院校，搵塊喺正港鐵站隔籬嘅就腳觀塘靚地喇，官老爺自私自利就想得周到，為班豆釘小學生建校，就有咁隱世得咁隱世，吹脹。係人都知，本地小學生書包出名係「重中之重」，孭住行上山都咪話唔攞命，港官唔通想考驗班學生吃苦頭嘅能耐？係嘅話，唔該港官帶頭畀仔女入讀，睇吓忍唔忍心見住自己骨肉為返學搞到身水身汗，得番半條人命。不過嘥氣喇，港官好嘢就益自己，衰嘢就留畀市民歎，難為教育局仲要強詞奪理，話小一學位分配沿用嘅「就近入學」原則，上個月已經取消咗喎，問你服未？
講真吖，公屋理應要配套齊全先安排入伙嘅，不過港官人頭豬腦，眼高手低，規劃水泉澳邨嗰陣，雖然預留咗用地興建小學同幼稚園，弊在教育局講得出做唔到，建校大歎慢板，拖到舊年至邀請團體申辦新校，令水泉澳邨三千幾小學生喺呢段真空期被迫到邨外返學，有啲仲要去到馬鞍山、旺角、天水圍咁遠上課，嘥時間又嘥車費，官老爺點止坐喺冷氣房閉門造車咁簡單，直頭係大整蠱。最慘係三年後班小學生唔少都已經升中，間小學又起到紫禁之巔咁高，到時想搵邨外學生報讀都難，你話班官係咪搵嘢嚟搞吖。
都係嗰句喇，港官冇心冇肺冇靈魂，施政只識厚待自己，刻薄市民，兼夾做事慢九拍，連起間小學都甩轆過人，仲妄想填海造島，根本係不自量力。造島計劃備受各界質疑，家陣知點解喇！