政情：捕獲偶像施丹 顏汶羽以為發夢眼花
法國球王施丹旋風式訪港，唔少網民都喺社交網站分享「野生捕獲」呢位足球傳奇嘅相片。青年民建聯主席顏汶羽（Frankie）尋日亦成為幸運兒，身為足球迷嘅佢笑言，見到球王真人一刻，以為自己發夢眼花，再三問身邊同事確認無睇錯，先識衝上去要求合照咋！
Frankie將合照放上網「呃Like」，引嚟唔少人留言。好似工聯會鄧家彪就猛讚Cool，立法會議員陸頌雄就話，施丹擔任進攻中場充滿藝術感，認為對方係真球王咁話。
捉住影相 形容對方含蓄
Frankie話，施丹喺廿年前世界盃帶領法國擊敗足球王國巴西，自此就開始留意佢，對於佢嘅一舉一動記憶猶新。今次有幸遇上偶像，真係開心到飛起。Frankie又話，施丹同預料中一樣含蓄，影相過程中面帶笑容但一言不發。不過佢嘅身形就比想像中單薄，特別係對足球員嚟講，覺得單薄咗啲，不過佢係技術型球員，唔使同人撞嘅。Frankie一輪嘴咁講，真係成個小球迷咁款。