政情：陳健波自爆同陳姓前議員冇偈傾
立法會議員有成六十幾個，雖然分晒建制同民主兩派，不過大家同事之間朝見口晚見面，點唔妥極都會打個招呼嘅。身兼立法會財務委員會主席嘅陳健波（波哥），尋日出席網台節目時就自爆，同好多議員都有偈傾，包括一啲激進派，但唯獨同一位姓陳嘅前議員就冇嘢傾，見到面都唔會打招呼，到底波哥同邊個有咁大牙齒印呢？
「做人係要有底線」
波哥喺節目中起初都唔肯透露對方係邊個，但係喺節目主持人、前民主黨主席劉慧卿（卿姐）嘅追問下，先透露對方姓陳，但唔係現任立法會議員陳志全。波哥批評呢位陳姓議員好過分、不知所謂，所以就無再聯絡喇。佢仲話做人係要有底線，有底線先會互相尊重。卿姐聽完隨即再追問呢位仁兄係咪前立法會議員陳偉業（大舊），波哥就話：「呢個我費時咩啦，大家自己去諗啦。」
翻查過去報道，波哥同大舊以前確實成日喺財委會上爆口角，唔止由朝早鬧到夜晚，仲會由會議廳鬧到立法會大樓走廊添。當年大舊鬧波哥「白癡」，而波哥就反擊話大舊係「人渣」添。睇嚟兩人嘅宿怨仲未解開噃！
另外，近排唔少人都不滿政府官員嘅立法會備詢嘅表現，波哥都形容班官員好似一個機械人，建議佢哋要誠懇啲，唔答得就坦白啲講，咁樣大家反而會收貨。