政情：「雙牌頭」餘波未了 白鴿勢爆退黨潮

有退黨者計劃組織新聯盟

白鴿黨經過幾次退黨潮之後，已經四分五裂，其中新界東早幾年即出現過退黨潮，當年有三十位「改革派」成員因為不滿該黨支持政改方案而退出，後來另起爐灶成立新民主同盟。據悉今次集體退黨嘅人士中，有至少十名係現任區議員同埋社區主任，佢哋亦計劃組織新聯盟添。

喺「雙牌頭」風波中受影響嘅柯耀林，據悉需要喺三個月內決定退黨與否，而相關限期將於本月中屆滿，所以相關人士最快喺下星期會公布去向。至於丁仕元同區鎮樺就同該黨立法會議員林卓廷屢傳不和，前日舉行嘅領導層改選中，有部分屬新界東支部嘅黨員，包括林卓廷、同佢友好嘅莊榮輝、冼卓嵐都分別拎咗超過七十五張不信任票。據悉有部分前綫系黨員手持唔少授權票，再加上新東近來發生唔少派系風波，難免令人產生聯想。

丁仕元：同林卓廷合作唔到

對於退黨傳言，丁仕元回應時話同民主黨冇仇恨，但係喺地區工作上同林卓廷就合作唔到喇，所以會退黨。而區鎮樺就話考慮中，因為入黨已經十年，有一定嘅感情，但係考慮退黨嘅因素都係同林卓廷有關。至於柯耀林就明言好大機會退黨，李永成就話仍然考慮中。

面對黨友嘅說法，林卓廷就話本身同地區同事合作無間，當中有部分屬前綫系成員。佢仲大呻覺得好無奈，事關禁止雙牌頭出選係黨內中委同埋選舉委員會嘅決定，唔係佢話事，而且退黨傳聞已傳出逾三個月，如果傳言最後成真，覺得大家應該喺各自嘅崗位繼續努力。

同屬前綫系嘅前主席劉慧卿就話，自己曾經當選黨主席，唔少前綫系成員亦都做過黨內領導職務，證明佢哋喺黨內冇被邊緣化。至於退黨傳言方面，佢就話冇人同佢提過，不過勉強冇幸福，如果唔開心就離開喎！