政情：今日你上鏡：三耳局長蒙眼 聆聽視障者世界
正所謂「眼盲心不盲」，盲人雖然不能用肉眼去看世界，卻以心去體會身邊嘅一切。政制及內地事務局局長聶德權尋日出席活動時被蒙上雙眼，以感受視障人士生活。唔知人稱「三耳局長」嘅佢「聽」到嘅世界又係點樣o架呢？
怕差錯腳 捉實領行員
心光盲人院暨學校尋日舉行第三屆「心光傲行」，活動有約五百五十人參加，合共籌得超過五十萬元善款。聶德權致詞時，勉勵大家喺遇到困難、挑戰同障礙時，要以正面態度同積極人生觀發揮所長去面對。而到蒙眼行時，聶看似仍有擔心怕差錯腳咁，捉到領行員隻手實一實啊。