政情：梁智鴻：交通意外同愛滋病都可致命

香港愛滋病基金會早前舉行紀念晚會，悼念因愛滋病逝世嘅人，同時提醒市民要定期做HIV測試及要有安全性行為。講起安全，基金會主席梁智鴻就話，路面上嘅安全同樣重要，事關交通意外同愛滋一樣可致命，所以佢每逢食咗藥或太疲倦，都唔會揸車，故此幾十年都冇遇過驚險情節喎！梁話，以前喺外國工作時，試過放工後好攰，但又要揸車，佢就會先揸去一個可以停車嘅地方休息陣，等精神恢復，仲話幾時都要安全至上咁話。