政情：胡志偉不信任票增倍半 冧莊白鴿黨主席

尋日仲選出兩位副主席，包括爭取連任嘅羅健熙同埋翻兜副主席一職嘅立法會議員尹兆堅。羅健熙嘅不信任票仲多過胡志偉，有成六十六張，高達兩成七，信任票方面就有一百七十四張。至於尹兆堅所得嘅信任票係三人中最高，有成二百四十三張，不信任票只得三張。

反映黨員不滿老鴿

中央委員選舉方面，由於毫無競爭，所以名單上嘅廿七人都獲得足夠信任票當選。不過據悉今次選舉中亦有出現唔少不信任票，其中有份捲入該黨新東支部選舉風波嘅立法會議員林卓廷、社區主任莊榮輝同冼卓嵐，都有逾八十張不信任票，而冼更加有九十一張添。

另一方面，雖然唔少元老都退下火線冇再參選，但係都仲有張賢登、蔡耀昌、李永達同埋單仲偕等老鴿參選，除咗單仲偕之外，其餘三人嘅不信任票都超過七十張，顯示對黨內嘅老人政治不滿。

今次選舉另一個焦點，就係前主席劉慧卿（卿姐）復出參選紀律委員會成員，同其他八名候選人一齊角逐七個席位。結果老鴿陳樹英同埋爭取連任嘅李偉峰最終落選，卿姐雖然成功當選，不過只取得一百五十三票，得票率約六成七，排尾二。至於以最低票數當選嘅係沙田區議員鄭則文，比卿姐仲少一票。

對於今次有咁多不信任票，胡志偉就話冇辦法去區分不信任票嘅根源，未來會走訪十八區，細心聆聽黨友嘅意見，釋除佢哋嘅疑慮，希望以最大嘅誠意，同埋以大公無私嘅方式解開矛盾。政圈流傳有唔少人會退出白鴿黨，胡就話至今都未收到退黨申請，如有此事會尊重黨友嘅決定。

近年白鴿黨黨員凋零、青黃不接，黨內新一批領導層仲要被投咁多不信任票，睇嚟胡志偉真係要認真諗吓點樣執生喇！