中環出更：資助託兒班冇位 容海恩鬧爆勞福局
開講有話「子非魚，焉知魚之樂？」立法會議員容海恩（Eunice）自懷孕以來，對媽媽權益愈嚟愈關注，似係針拮到肉先覺得痛。Eunice慨嘆做媽媽遇到好多問題，佢早喺懷孕五個月已報名排政府嘅資助託兒班，點知估計要到BB出世九個月大先有位，大轟政府學額唔夠、資助唔夠、宣傳唔夠，根本幫唔到雙職父母。佢仲話如果勞工及福利局搞唔掂，就會向司長追，再唔得就向特首追，總之要有人處理喎。
同老公傾咗分工湊B
Eunice自今年八月結婚後，好耐無同老公袁彌昌「合體」出巡，前兩日兩人就齊齊出席一個支持媽媽創業嘅活動。問到係咪老公想暗示無限量支持佢繼續工作？Eunice笑稱，梗係要喇，同埋個活動係袁彌昌小學同學搞嘅，咪去支持吓囉。佢仲話，初步傾咗同老公分工湊BB，但亦一早報咗託兒班，希望快啲有位。
Eunice好勞氣話，依家託兒班已經有好多嘢學，唔係放BB喺度瞓就算，價錢仲唔平，政府資助後都要成五千多元一個月，直指呢類託兒班做到朝八晚六，甚至晚七，對好多父母嚟講好重要。佢呢排已經日鬧夜鬧勞福局，希望可以為城中媽媽爭取多啲喇！
卓妮