中環出更：撞名累事 王國強難忘被當走私犯
好多人都同名同姓，撞名有時會惹起誤會，亦會鬧出唔少笑料。早前喺一個活動上，卓妮同廣東社團總會前主席王國強（KK）同立法會議員蔣麗芸嘅丈夫梁海明講起呢個話題，佢哋都有同人撞姓名嘅經歷，KK仲試過喺台灣出入境時被查問走私事件，其實係受同名同姓之累啫！
KK笑稱自己個名太普通，隨街都係「王國強」，細個讀書時都有幾個相同姓名嘅同學。咁咪有好多趣事發生？佢就苦笑話，香港身份證上面未有相片之前，過親海關都會畀人捉住查問，最難忘係三十幾年前喺台灣嘅機場過關時，被查問前幾日係咪走私黃金去泰國喎。呢類蝦碌嘢唔止一次，佢話出入澳門都經常被認錯，後來身份證上有相之後就好好多喇！
梁海明聽完就笑稱，自己只識得一個「王國強」喎。佢話自己個名都好普遍，其中有位好朋友都叫做梁海明，就係絲路智谷研究院院長梁海明喇，兩人仲一齊寫過文章添，真搞笑。
當日係中國和平統一促進會香港分會就職典禮，執行會長陳亨利（Henry）同太太陳趙滿菊、身兼香港工業總會副主席嘅Henry細佬陳祖恒都有到場。講起同台灣嘅淵源，Henry笑稱自己有四個仔女，其中台灣女婿同台灣新抱各有一名，關係當然密切喇！
李大壯鍾情客家花布做衫
都係台灣女婿嘅港台經濟文化合作協進會主席李大壯都有到場，見佢着住件中式衫反袖係客家花布，唔使問就知係台灣出品。佢笑稱近年都喺台灣做衫，一年要做四、五套，反袖內裏全部都係用客家花布，一來因為絲綢太軟滑，捲唔起，二來客家花布顏色鮮艷啲，夠晒靚咁話。
卓妮