編輯基因成為全球熱話，皆因內地學者宣稱透過編輯胚胎基因，成功令雙胞胎女嬰對愛滋病免疫，引發不道德嘅爭議。不過凡事有兩面，如果有人將港府庇奸護淫、崇洋懼外嘅基因剪走，咁就唔止冇爭議，仲一天光晒添。
唔係講笑，港府出名包庇反中亂港集團，幾核突都做得出手，好似壹淫媒漢奸黎爆粗恐嚇東方報業集團記者案，事隔十七個月，東方及受害記者之前十次發信質詢辦案進度，律政司一味大玩拖字訣。嗱，日前東方及受害記者第十一度去信律政司，又係得到千篇一律嘅虛話廢話回應，唔係話要徵詢法律意見，就係話不評論案件，回覆字眼次次搬字過紙，擺明翹埋雙手睇你點死，為虎作倀，迫害忠良，有冇再可恥啲吖！
真係諗極唔明，漢奸黎喺光天化日之下指住東方記者爆粗恐嚇，「×你老母×」、「我影×咗你嘅相」及「我實會搵人搞×你」，唔止踐踏新聞自由，直情無法無天，仲要全程被攝錄機拍下，有圖有片鐵證如山，律政司居然餐餐以「徵詢法律意見」為藉口，簡直荒天下之大謬。正如立法會議員話齋，換作涉案者係普通人，一定有不同講法。如果受辱嘅係律政司司長或特首，加害者一早被告到甩褲喇，法律面前係咪人人平等，仲使問咩！
大家一定記得，佔中期間有三名民間義士路見不平一聲吼，向佔中金主兼日日坐喺金鐘「私家皇座」充當總指揮嘅漢奸黎投以豬雜洩憤，佢哋下場係點？咪就係速告速判速坐監囉。反觀漢奸黎唔止策劃指揮佔中走得甩，就連政治黑金案都以「證據不足」獲放生。冇計㗎，鬼叫你唔係反中亂港集團咩，鬼叫你愛國愛港咩，受迫害被打壓係咎由自取嘅咋。
唔係咩？受害記者同東方一樣，本着愛國愛港嘅初心做好新聞工作，兢兢業業，發揮第四權維護公義，殊不知連自己嘅權利都維護唔到。面對一宗涉及大是大非、黑白分明嘅案件，律政司不但冇主持公道，甚至連一句告定唔告都語焉不詳，就算東方編採部門過千名同事替受害記者不值，支持佢繼續維權，但受害記者被律政司咁樣玩殘，消磨意志，真係唔知仲撐到幾耐。唔通真係要逼東方報業轉軚加入反中亂港集團，同港英餘孽同氣連枝，律政司先至肯還以公道？
事實擺在眼前，反中亂港密密放，愛國愛港任人劏，難怪有人慨嘆，早愛國不如遲愛國，遲愛國不如不愛國，不愛國不如賣國。所以話啫，阿爺仲唔出手改造港府黑白不分、是非混淆嘅基因，香港遲早死得！