政情：八網難逃：岑智明同女戰俘有段古
天文台台長岑智明早幾日喺Facebook 上載咗一張同一個外籍女士嘅合照，呢位女士係乜嘢人呢？係戰俘。
呢位英籍女士名為Barbara Anslow，喺一九三八年同父母及兩姐妹一齊移居香港，當年佢擔任政府速記員，而喺一九四一年香港淪陷，佢同逾二千人一齊被關進赤柱集中營，關押逾三年半，而佢嘅丈夫亦係喺集中營認識嘅，佢亦曾出書講述集中營嘅生活。
咁同岑智明有乜淵源呢？當然同天文台有關喇！翻查資料，當年Benjamin Davis Evans一坐正做天文台台長就不幸遇上香港淪陷，喺幾年前岑智明曾透過一啲聯繫，並電郵Barbara Anslow，問起當時Evans嘅情況，Barbara好快就記得嗰段日記，寫低咗Evans「常常在集中營天台教大家天文學」。
過兩日係Barbara百歲壽辰
岑智明曾到訪Barbara，仲影低咗呢張合照，當時Barbara已九十四歲，但仍然相當精靈。點解突然又上載呢張相呢？當然係出於想念喇，事關十二月一日就係Barbara嘅百歲壽辰嘞！