政情：立會餐廳停派膠飲管 明年全走塑
塑膠對環境破壞有幾大，相信都唔使多講，依家政府亦鼓勵緊啲食肆唔好派即棄膠餐具添！立法會秘書處尋日通知，立法會餐廳亦打算「走塑」，由本周六開始唔再供應塑膠飲管，明年開始仲會全面「走塑」，即棄塑膠餐具統統停止供應。聽聞就連立法會五樓議員咖啡角都會「走塑」喎。
提供紙飲管 用者自付
為咗配合秘書處推行「停用即棄塑膠餐具」環保工作，立法會餐廳亦即將開始「走塑」，但會按個別顧客要求提供紙飲管，有關費用就「用者自付」。至於餐具方面，「走塑」後就會免費提供木製筷子同木棒，顧客亦可以向餐廳購買木製嘅叉、餐刀同匙羹。
講真嗰句，議員喺立法會都有間房，放多套餐具並唔係難事，如果第日買飯，連木筷子都唔攞，咁就更環保嘞！