政情：張宇人處男拉布 黃錦星拆彈頭痕

討論建回收中心 中止議程

建築界議員謝偉銓喺會議上率先向政府開炮，直言雖支持回收中心二期工程，但希望政府書面回應議員問題時「早少少」，認為政府對有關議題應早有準備，但喺前日下午五時半先回覆議員，議員「要消化都困難」。張宇人隨即批評政府做法係「不能接受」，佢早前曾問政府有關內地回收廠嘅情況，當局亦未有回覆，仲反諷叫政府不如隔兩個星期後再傾添！

張宇人之後亦多次向在席嘅環境局副局長謝展寰提問，似乎都唔多滿意政府答案，仲話︰「我眼又矇，耳又聾，你講慢少少，吟吟噚噚我聽唔到。」由於佢已提問咗十幾次，小組主席盧偉國提出要就議員提問「劃線」，佢當然反對。盧就要求佢勿再喧嘩，佢反駁︰「掟我走吖！」佢其後更動議中止議程，直斥工程費用昂貴，政府有錢都唔應該將公帑掉落鹹水海。

今次可能係張宇人動議中止議程嘅「處男作」，雖然佢事前已特登行去民主派議員席前「請教」，但都一度講錯動議中止嘅條文，需作出更正。而動議喺佢加埋黨友航運交通界議員易志明同民主派支持下，以十二票贊成，四票反對獲通過，真係贏下拉布第一仗。

環境局坐定粒六 建制唔撐

值得一提嘅係，表決中止動議時大部分建制派都冇投票，當中仲有人明知要投票都離開會議室。有建制派議員話呢鋪佢哋都撐張宇人，加上政府強推「四電一腦」計劃已搞到一鑊粥，最近又再提出垃圾徵費建議，市民都鬧爆政府，如政府唔作出改動，作為建制派都難以再支持垃圾徵費建議喇，而回收中心二期工程並唔緊急，所以要畀啲顏色政府睇吓咁話。仲有人透露，話環境局事前完全冇拉票，諗住坐定粒六，就算開會先嚟拉票，都會投反對票。

過咗中止動議之後，張宇人好開心咁喺前廳請議員食蛋糕，又話朝早十一點有人同佢講：「我哋離席，你就要請食飯。」佢反問請食蛋糕得唔得？咁通過咗，佢就兌現承諾請食蛋糕，跟住仲叫民主黨議員黃碧雲食，話多謝民主黨支持佢個中止動議。佢哋就「慶功」，睇怕黃錦星就好頭痕，要攝高枕頭諗吓點拆彈喇！