中環出更：柯創盛跟進疫苗風波 徐德義唔騷佢
有四價流感疫苗含白色懸浮物，其中有七萬五千劑懷疑已經注射，唔少地區人士過去都有舉辦流感疫苗注射活動，所以都非常關注事態發展。不過議員緊張唔代表政府一樣，好似立法會議員柯創盛（柯仔）向相關官員查詢時，隔咗一日都無回應，到底邊個官員咁大膽呢？
柯擔心對方因嫌煩封鎖
柯仔話尋晚已經WhatsApp聯絡食物及衞生局副局長徐德義，想了解流感疫苗問題，因為地區兄弟一見到有關新聞都好慌張，而且佢上星期先喺立法會接種疫苗，點知徐德義全日都冇回覆，大嘆對方係咪嫌佢煩，將佢Block（封鎖）咗！
佢仲透露，以往搵徐德義都唔係成日獲對方回應，但現代人已善用科技，利用WhatsApp幫手，尤其對呢類緊急議題。佢認為就算對方仲未有答案，都可以簡單覆句「收到」或者用OK手勢，大嘆依家只係單向溝通。不過，柯仔都讚有啲副局長回覆迅速，好似政制及內地事務局副局長陳帥夫、保安局副局長區志光同勞工及福利局副局長徐英偉等。柯仔話徐德義喺黃昏終於回覆佢，並為唔覆機致歉，仲確認咗立法會之前打嘅疫苗唔係受影響嘅批次。