中環出更：章曼琪打波爆旗袍 急用釘書機補鑊
近排旗袍風再起，事關旗袍嘅裙身修腰及開衩，將女性嘅體態美展露無遺。不過，金紫荊女企業家協會（協會）常務副主席章曼琪就唔太喜歡着旗袍，仲自爆試過裙腳開衩撕開，要用釘書機釘住出街添！到底發生乜嘢事呢？
早排協會舉辦未來領袖頒獎典禮，見到唔少女學生出席，講起中學年代生活時，章曼琪話以前讀女校着旗袍，但勁唔方便，試過喺學校同同學打波，一下無留意，裙側開衩位爆開，尷尬到要即刻用釘書機釘住，唔係實畀老師鬧。所以大個做嘢時，佢已經好少着裙，可以嘅話都必定着褲喎。
蔡若蓮話旗袍好難着
同場嘅教育局副局長蔡若蓮當日都着一件白色底、印有中式墨畫嘅旗袍，顯得雍容華貴。但佢就笑稱好難着，依家仲學習緊，覺得每次着起旗袍都要正襟危坐，唔好粗粗魯魯，又要慢慢行。問到使唔使縮肚仔，佢就話唔使，講明着旗袍要有少少肚先好睇。
另外，協會近年挑選部分Band 2或3嘅中學提供師友計劃，協會主席丘璟珊就話Band 1學校有好多資源，相反次一等嘅學校學生好似夾心咁，希望由協會會員可以親身傳經驗畀同學。
有份參與計劃嘅協會第一常務副主席林淑怡直言，如果小時候有呢類計劃，今日嘅佢就可能不一樣。佢解釋，細個唔知想做乜嘢，感覺好迷惘，父母話讀會計就去讀，近年先發現自己喜歡電腦，所以佢好努力將自己經驗同同學分享。佢嘅學員袁瑋惠就話經過多次傾偈，終於明白人生唔係只有讀書，可以好似林淑怡咁，任何年紀都可以重新學習。
卓妮