世上有好多嘢係名不副實，部分美容院可能就係其中之一，美容淪毀容甚至殺人呢一筆唔講，就講預繳消費吖，多年來都係投訴嘅重災區，無良業界拉客手法無所不用其極，甚至賤格到連肢體傷殘同精神狀況有問題嘅客人都照劏可也。為咗一個「錢」字，啲商界敗類可以去到幾盡，真係冇人話得埋。
呢，消委會點名譴責一個美容集團旗下十六間分店以不良手法營銷，當中包括以低價體驗作誘餌，等顧客自投羅網後，再以高壓硬銷方式逼買療程；未經同意就以顧客信用卡購買療程；收費同療效不符等，淨係今年頭十個月消委會已經收到二十九宗投訴，牽涉金額高達一百三十萬元，可見呢個集團幾咁狼胎。試過有位殘疾人士，月入得嗰九千蚊咁大把，竟然被推銷買咗個三萬七千蚊嘅療程，一位殘疾人士用超過四個月嘅人工美容扮靚，合唔合乎常理各位可以自行判斷，不過店方就企硬話係當事人自願購買，即使家屬拎埋醫生證明上門理論，都堅持唔退款，吹脹！
「唔怕你精，唔怕你呆，最怕你唔來。」講真吖，美容行業泥沙俱下，不良營銷手法多不勝數，除咗威逼利誘，仲試過以做療程為名，等客人剝晒衫再變相禁錮恐嚇，早排就有專向「寂寞的心」埋手嘅美人計、暖男計，落藥氹人買下大批美容套票。呢類那渣招真係只有你諗唔到，冇佢哋做唔出呀。
話時話，對付呢一類欺詐消費並非冇辦法，外國一早設立消費冷靜期，證明可以有效阻嚇商業欺詐，本港輿論亦強烈要求港府為美容、健身、時光共享等預繳式消費設立冷靜期，弊就弊在呢個政府睬你都傻，至今無所作為。香港有冇官商勾結，官老爺係咪助紂為虐，仲使問咩！
照計立法設立銷售冷靜期又唔係移山填海大工程，更加唔係人類登月上火星，咁點解講咗N咁多年到依家都係得個吉呢？講到底咪就係呢個政府廢，官老爺多一事不如少一事，少一事不如不做事，被追到瘦咯喎，咪掟出「自由市場」、「商界利益」或者「先做公眾諮詢」嚟做擋箭牌囉。港府自動放棄監管之責，無良商人仲唔借頭借路，想點就點，劏得就劏咩。
講起就諷刺，美國傳統基金會年年將「最自由經濟體」嘅桂冠頒給香港，而港府就次次笑而納之。冇錯，香港的確自由㗎嘛，點止營商自由吖，仲有劏客自由、欺詐自由、佔中自由、禍港自由、假難民販毒劈友食大茶飯自由，香港喺作奸犯科方面嘅自由度，絕對係冠絕全球。