政情：AI當道 鄭優美：文化人更馨香
最近內地出現第一間無人酒店同埋人工智能（AI）電視主播，未來被科技取代嘅行業似乎愈嚟愈多。醉心中華文化嘅金紫荊女企業家協會成員鄭優美就話，AI當道反而對推廣文化有好處，因為好多行業勢必會被人工智能取代，所以如果想保持競爭力，就要做到機械人做唔到嘅事，例如蘊含文化元素嘅事物。
懂欣賞者多 睇好發展
身兼本港最悠久收藏家團體「求知雅集」玉器顧問嘅鄭優美，早年由內地移居香港，佢家族四代一直經營古董及藝術品生意，自己亦喜歡設計融入中華文化元素嘅珠寶首飾。佢話雖然香港十分西化，但係仍然有好多識得欣賞古文化嘅人，當中包括年輕人，所以佢唔會覺得灰心，仍睇好中華文化可以喺香港進一步發展。
講開唔少本港年輕一代甚至嫌中華文化「老土」，鄭優美笑稱，喺AI嘅衝擊下，相信年輕人好快就會明白，如果掌握多啲中華文化，自己身價就更馨香喇！