政情：太太法國進修 何啟明暫掌囝囝主導權
唔少父母為咗子女教養問題，經常會因為意見唔同而有爭拗。勞工界立法會議員何啟明最近一年就少咗呢啲煩惱，事關佢太太去咗法國巴黎讀書進修，暫時相隔兩地，兩人就少咗為兒子成長時食啲咩、讀邊間學校爭執，仲因為相處時間少咗，反而感情更加好喎！
逢節日返港 少咗爭拗
何啟明話，每晚都會同老婆進行視像通話，由於香港時間比法國只係快咗七個鐘，香港嘅夜晚就係法國嘅下晝，雙方都唔需要捱更抵夜先「見面」。何太十分「黐家」，每逢節日都會飛返香港團聚，除咗聖誕節、復活節同暑假等主要節日外，連萬聖節都返嚟一個月，何啟明笑言個仔都唔覺媽媽去咗外國，反而似去公幹多啲。
由於相隔兩地，兩人更加珍惜見面時間。何啟明又話，以前係由太太主導個仔嘅成長，兩人間唔中意見唔同，依家就由佢一個人決定個仔讀咩書、學啲乜，拎番主導權，家庭氣氛仲和睦咗咁話。