中環出更：譚文豪赴英研討會 建制冇代表
過往每年立法會都會派出一名建制派及一名民主派議員遠赴倫敦，代表出席英聯邦議會協會舉辦嘅國際議會研討會。不過今年罕有地只得民主派議員譚文豪（Jeremy）單拖出席，未有建制派有興趣報名。Jeremy喺香港時間周日深夜上機，一到埗去酒店梳洗後就立即出發去開會。與慣常一樣，今次立法會秘書處亦有派一員參加研討會，與各地議會秘書處交流。
同32國家地區議員交流
Jeremy話，好難得可以一次過同三十二個國家或地區議員交流，當中不乏一啲細國家及港人唔熟悉嘅地方代表，好似非洲內陸國家馬拉威（Malawi），而呢啲地方都對香港唔太認識，會問香港與內地關係、香港係一個點樣嘅城市等，所以要由《中英聯合聲明》講到一國兩制，逐樣去解釋。佢仲話，稍後英國國會議員會交代最新情況，相信會提及脫歐進程，到時佢會提問對香港有咩影響等。
講開又講，早排有建制派議員呻，外國機構淨係識搵民主派了解香港政治情況，導致國際社會對香港睇法有偏頗，但係建制派連呢啲年度會議都唔出席，認真好難怪人唔搵建制派嘅，始終蘇州過後無艇搭㗎嘛！