中環出更：郭振華讀書曳事 試過自製炸藥
早幾日香港浸會大學學生開生日會時，因互撒麵粉導致粉塵爆炸意外，唔知啲名人讀書時有冇玩過撒麵粉呢？卓妮趁早前香港理工大學舉行大學院士頒授儀式時，同幾位獲頒榮銜嘅名人傾過，香港工業總會主席郭振華（Jimmy）笑笑口話，麵粉冇玩過，但係就試過自製炸藥喎！
Jimmy開化工廠，大學都係讀化工，佢笑稱自己有呢方面嘅天分，因為佢爸爸都係做呢行。記得讀中學時，曾經用硝酸鈉、碳粉磨成灰自製炸藥添！咁咪好危險？佢笑笑口話只係燒一陣、出啲煙火咁啫！
倫倫練古箏 起晒水泡唔放棄
同樣獲頒院士榮銜嘅國際知名古箏大師鄒倫倫（倫倫）童年就冇咁得閒喇，事關佢出身古箏世家，係家族第四代古箏傳人，小時候日日苦練，連玩嘅時間都欠奉。佢話細個經常練到手指起晒水泡，甩皮之後再起過水泡，成日痛到喊，但都要繼續練，從來冇放棄嘅念頭。佢笑笑口話，手指磨出繭之後就冇感覺嘞，聽落真係好勵志。
倫倫嘅眾多親友都到場為佢打氣，包括專程由內地來港嘅媽媽同埋古董文物藝術修復專家張鍾麗裳（Lisa），Lisa讚倫倫好有愛心，兩人經常拍住做慈善演出，倫倫彈古箏，佢就唱歌，合作相當愉快。
獲頒榮銜嘅仲有立法會前議員陳鑑林（橄欖），接佢棒做立法會議員嘅柯創盛遲到都要趕來撐場。橄欖一向好識投資，唔知最近佢嘅策略係點？佢話早喺恒指三萬點時已出晒貨，只留低適宜長揸嘅股票。依家主要工作係打理廿二年前喺瀋陽獨資投資嘅大型批發商場物業。嘩！依家物業升晒值，咁咪三世都食唔晒？
卓妮