成日話香港係福地，呢鋪講法怕且都要戒咯。事關港官防疫意識弱過弱雞，對社區響起衞生警號闊佬懶理，無論係新風土病類鼻疽定係老鼠傳人戊型肝炎，官老爺都係唔嗲唔吊，任由怪病威脅港人健康。正如「東方報業民意調查」顯示，大部分受訪者鬧爆港府預防同宣傳都差到冇朋友，根本就係話之你死。
市民咁嬲係有原因嘅，就講類鼻疽吖，過去二十年本地個案急增，唔止變成風土病，死亡率更高達三成一，比其他流行地區仲要高，話唔驚就假。之但係衞生署就懶懶閒，到依家都未將類鼻疽列作必須呈報傳染病，步伐落後台灣十一年，仲有冇漏氣啲呀？難怪有立法會議員話港府防疫措施堅離地，梗係喇，下下旨意醫生自願呈報，同將責任當波踢有乜分別？嗱，有家庭醫生就摑港府一巴，話對呢個病一無所知，病人組織亦都話基層醫療層面唔容易發現呢個病，睇到喇，官老爺叫人自願呈報喎，即係等同廢噏啫。
再講吖，類鼻疽可以經由污水或者土壤傳播，港大做過研究，喺一間海洋水族館驗出呢種菌，喺郊外無專人打理嘅大自然環境下，呢種菌為數有幾多，真係冇人話得埋。近年唔少港人鍾意放假行吓山，政府唔帶頭正視呢個病，對類鼻疽零宣傳，市民想預防都唔知點做，唔少市民喺民調都話擔心不知不覺下賴嘢，狂炳政府有責任加強宣傳。行山明明係有益身心嘅活動，萬一行完山中咗類鼻疽，港官對防疫掉以輕心，豈非變相靠害市民？
不過咁，就算足不出戶都唔代表健康有保障，事關家陣全港各區都有鼠患投訴，啲老鼠仲要肥過隻貓兼唔怕人，食肆、後巷固然係重災區，仲入侵埋民居，何止鼠傳人戊肝得人驚，感染由老鼠引起嘅漢坦病、鈎端螺旋體病都唔係講玩。正如受訪者話齋，港府一味得把口話要加強滅鼠，實際上滅鼠方法咸豐年咁Out，黃大仙區連爆兩宗戊肝，鼠患指數竟然長期偏低喎，難怪被質疑反映唔到事實，仲分分鐘造假。不過你咪理，港官就係鍾意攬住堆數字嚟自High。鬼咩，又唔係林鄭食食吓飯跌隻老鼠落嚟加餸，港官滅鼠梗係你急佢唔急喇。
回歸廿一年，奇難雜症爆足廿一年，沙士死亡人數多達二百九十九人不特止，就連全球首例人類感染禽流感、亞洲首宗豬流感等不光彩紀錄都成為香港嘅囊中物，加埋公院醫生發雞盲睇漏Ｘ光片，搞到肺癌病人延誤診治，港人年年準時交稅，得到嘅衞生環境同醫療服務竟然連第三世界都不如，怎一個慘字了得！