政情：食得海鮮多 徐英偉尿酸膽固醇超標
好多人睇落健健康康，原來都周身病痛。好似勞工及福利局副局長徐英偉（Caspar）原來尿酸同膽固醇都超標，而尿酸更加已超標十幾年，成因係以前做商界食得海鮮多，仲試過痛到半夜拐住叫的士去醫院打針止痛，依家間中都會痛得好緊要，所以長期要戒口，一年只可以食一次海鮮，屋企亦常備止痛藥。
懶理醫生 照食快餐店
佢聽講尿酸高要飲青木瓜茶，所以太太都會煲畀佢飲，仲會飲椰青水添，但就唔肯食膽固醇藥，因為一食就要食成世。講開木瓜，佢話以前做銀行，成日去樓下買木瓜奶，好鍾意飲，仲要加碼，貪佢營養好喎，當時個個同事都知佢係「焚化爐」，食飯一定包底食晒所有嘢，但點食都唔肥。
依家就冇呢支歌仔唱嘞！佢話最近驗身，醫生叫佢減廿五磅，估計致肥原因可能係因為一日飲兩罐可樂，但佢冇計劃要減肥喎，打算照食快餐店。