政情：勞顧會要攻又要守 鄧家彪話唔啱議員做騷
工聯會嘅立法會勞工界前議員鄧家彪（阿彪），早前成功連任勞工顧問委員會勞方委員，佢喺最新一期工聯會雙月刊回顧過去兩年喺勞顧會嘅工作時，話最難忘嘅係爭取取消強積金對沖機制嘅過程，仲話背後火花唔少添！而勞方委員唔單止要一齊進攻，更要緊守龍門。佢又批評，現時立法會已扭曲成表演場地，部分議員只顧個人表演，直言呢啲咁嘅做法喺勞顧會一定唔掂咁話。
阿彪二○一二年進身立法會，成為立法會勞工界議員，可惜四年之後轉戰立法會地區直選失敗，未能連任，其後參選勞顧會並順利當選。勞顧會上月再次改選，阿彪得以連任。佢喺月刊中回顧上一屆勞顧會工作，就提到由立法會走入勞顧會，係面對截然不同嘅談判同會議文化。
要有技巧 尊重同團結委員
佢話勞顧會並唔係單打獨鬥同表演嘅舞台，係要「有技巧意識同尊重」，去團結勞方委員，同時亦都要理解資方委員嘅心理狀態，因為勞顧會入面並非個人表演立場嘅場地，而係要透過會議同爭取共識下真正改善勞工權益，所以亦都要分對外同對內嘅策略，對內係喺會議中爭取資方對勞工界訴求嘅認同；對外就係藉傳媒關注，畀壓力同影響政府施政方向，令政府企喺勞方呢邊。
批立會淪為個人表演場地
曾任四年立法會議員嘅阿彪又批評，現時立法會已扭曲成表演場地，有部分議員只求講立場，唔會諗解決方法，亦因立法會議員係代表選民，所以主要係講清楚訴求，不過有啲人就扭曲到淪為個人表演，直言咁嘅做法喺勞顧會內就完全唔得喇，因為喺勞顧會內，除咗要清晰表達立場之外，爭取對方認同亦都非常重要，六個勞顧會勞方委員係要各有攻守，有人講道理、有人講數據、有人講感情，大家要有默契，再睇準方向去游說資方咁話。
聽阿彪咁講，似乎喺勞顧會嘅工作比立法會內爭拗來得更有意義，咁對普羅打工仔嚟講，阿彪係咪應該疊埋心水唔好再嘥時間參選立法會，專注爭取勞工權益嘅工作呢？