中環出更：盆菜宴走塑 陳正欣亦倡員工自備餐具
盆菜原本係新界原居民嘅傳統食品之一，但近年已愈嚟愈普及，好多食肆會喺大時大節賣盆菜，而保良局最近就搞咗個盆菜宴，仲係環保主題嘅盆菜宴，一律唔用即棄餐具、膠枱布等，仲呼籲市民自備餐具！副主席陳正欣仲話佢公司最近裝修完，特登喺茶水間整一個洗碗位，鼓勵啲員工多啲自備餐具添！
其實保良局並唔係依家先開始推行環保，佢哋唔少成員早就積極支持環保，陳正欣十年前開始已經唔會隨便掉電池，每次用完都會儲番佢，然後一次過交畀專門嘅電池回收商咁話。
講起自備，總理顧東華都話近兩年都開始自備水樽，佢話以前做運動會買水，但膠水樽實在太唔環保，所以改咗呢個習慣，佢話初初係有啲唔慣，但後嚟就將水樽當係銀包、電話呢啲必需品咁，日日都帶出街，咁就確保自己唔使買水喇！
李何芷韻捐舊校服畀新生
總理李何芷韻都係環保先鋒之一，自備餐具、用洗米水淋花呢啲基本功固然做到最足，佢仲會捐一啲舊校服出去畀有需要嘅人，身為三個細路嘅媽媽，佢感慨細路仔真係大得好快，啲衫好快就會唔啱着，所以佢會盡量將啲衫「一代傳一代」，而佢啲細路讀緊嘅小學會回收校服，再轉畀其他新生，咁就唔使掉咗啲校服咁浪費。
另一名總理何許穎嘉就話今次係佢第一次食盆菜，事關之前都冇機會食，雖則係第一次食，一樣準備充足，帶齊餐具出席！佢話依家出街食多數都會帶埋餐具，食唔晒要打包嘅時候就用自己嘅飯盒，唔使用餐廳提供嘅即棄飯盒。
卓妮