古人話，玩火者必自焚，唔到你唔信。浸會大學一幢學生宿舍樓層尋日凌晨發生二級火警，十二名學生受傷，原來佢哋為同學慶祝生日，疑蠟燭未熄之際互撒麵粉，引起粉塵爆炸，樂極生悲，冇搞出人命算好彩咯。
事發後，唔少網民鬧爆呢班大學生冇腦，完全唔知粉塵爆炸後果可大可小。咁又係呀，三年前台灣八仙水上樂園舉行「彩色派對」，期間狂撒色粉，因為粉塵濃度過高而引起燃燒爆炸，現場陷入一片火海，最終造成十五死、四百多人傷，教訓極之深刻。又好似多年前嘅深圳舞王俱樂部大火，有人將道具手槍點着舞台天花板，釀成四十多人死亡。所以話啫，一旦玩創咗個心，真係乜嘢奇災巨禍都有可能發生。
正如專家話齋，只要有齊「可燃性粉塵」、「散布」、「起火源」、「局限空間」同「充足氧氣」五大條件，即使粉塵數量極少，都足以造成搶火爆炸，甚至引發第二次劇烈爆炸，諗起都恐怖。今次大部分同學仔只係受輕傷，絕對係不幸中嘅大幸，希望佢哋吸取教訓，唔好再玩到得意忘形喇。
話時話，大學宿舍理應係學生作息嘅地方，偏偏家陣變成無王管嘅遊樂場，唔危險嘅玩意唔玩，唔擾民嘅活動唔做，聽聞大學生互撒麵粉已經唔係第一次，仲試過玩水添，每次瘋狂一夜後都將地方整到烏厘單刀，爛攤子就丟畀其他人收拾，唔止宿舍職員早有微言，部分愛靜嘅同學亦曾多次投訴。校方係就係提出設立「靜音樓層」，無奈遭部分學生反對而極速跪低。咁你話喇，大學生愈玩愈胡鬧，愈玩愈過火，除咗本身唔自律，校方姑息縱容係唔係深層原因呢？
睇吓今次出事後，上至大學校長，下至宿舍舍監，都只係對事件表示「悲傷沉痛」，形容為不幸，總之就係冇人夠膽直斥大學生嘅不是。鬼咩，今時今日大學生抗爭成風，稍不如意就玩佔領，早排先至有大學生因為不滿校方收回民主牆管理權，包圍及推跌副校長；再早啲嘅一單，浸大學生因為不滿普通話考試安排，爆粗佔領語文中心。大學管理層往往為咗息事寧人，大事化小，終於搞到大學生冇規冇矩，甚至連基本常識都欠奉，咁做到底係愛佢定係害佢，大家心照喇。
點都好，正所謂前車之覆，後車之鑑。大學係學習知識嘅地方，宿舍亦唔係遊樂場，大學管理層又好，大學生又好，都應該趁此機會吸取教訓，避免悲劇重演。雖然話任性係青春嘅專利，但任性極都要有個譜，否則害人害己，後悔已經太遲。