政情：粉墨登場 柯創盛扮船伕唱戲

柯仔透露，今次唱嘅劇目係同船伕有關，而喺其中一個環節就要打扮成船伕，撐隻船仔載個女演員去睇演出，仲要邊撐邊用潮州話講，要去睇柯仔唱戲喇！

花一星期籌備 苦練動作

為咗預備今次表演，佢特登花咗一星期時間去籌備。唔單止要去搵戲服，仲要預先練習撐船嘅動作。佢話呢排無論喺屋企定辦事處都係咁練習，由辦公室撐到門口，仲要畀議辦同事笑添！不過佢似乎唔太介意，仲同老婆講笑話係手痛，所以要做伸展動作。

今次柯仔嘅表演，原來係佢師傅、立法會前議員陳鑑林（橄欖）提議嘅，事關柯仔已經搞咗百幾場表演，聽日嗰場已經係第一百二十三場潮曲欣賞會，仲要有成四百幾位觀眾，所以橄欖就建議柯仔要搞番啲得意嘢。