中環出更：梁福元望繼續抱孫「多到夠組足球隊」
圍村人有喜事一向鍾意同鄉親一齊賀賀佢，十八鄉鄉事委員會主席梁福元今年喜事重重，大仔、二仔都有小朋友出世，女兒出嫁，明年仲會生仔添！梁福元特別喺大棠村廣場擺五百圍盆菜大宴親朋，仲特別邀請咗佢師傅、第一屆葵青區議會主席何冬青到場。梁福元話依家已有六個孫，希望啲孫多到夠組足球隊，最大願望係啲孫身體健康，快高長大喎。
當晚梁福元同仔女、女婿、新抱周圍招呼賓客。佢女兒梁婉蓉舊年訂婚，今年較早前已出嫁，梁婉蓉話已經有咗七個月，係仔嚟嘅，預產期喺一月，老公話最緊要做大B喎。轉頭見到梁福元二仔、元朗區議員梁明堅同太太陳麗絲（Alice），Alice相當細心，不時幫老爺抹汗。Alice講起自己三個小朋友都幾乖，大嗰兩個仲同房一齊瞓添！
話讀書唔叻唔緊要 有山莊可耕田
梁福元話未計即將出世嘅外孫，已有兩個孫仔同四個孫女，唔敢偏心，如果啲孫讀書唔叻都唔緊要，佢有咁大個山莊，就畀啲孫耕田種嘢，唔會做怪獸家長咁話。佢致詞時特別提到好開心唯一嘅師傅何冬青出席，何已年屆九十，仲教佢好多做人嘅技巧，講講吓，又不忘講吓元朗有好多棕地同農地，叫政府諗吓用嚟解決短期房屋不足喎。
出席盆菜宴嘅嘉賓眾多，包括發展局副局長廖振新、立法會議員劉國勳同麥美娟，元朗區議會主席沈豪傑亦係主角之一，仲帶埋太太、律師會理事黃巧欣一齊嚟添。麥美娟乘機同何冬青及其兒子何少平一齊合照，麥美娟話已經十幾年冇見何冬青，佢同何少平做過同事o架，原來何冬青係第一屆葵青區議會委任議員，何少平就係最後一屆委任議員。
卓妮