安仔和全哥是倉務員，經常要搬運貨物。今日，安仔搬運貨物後按着腰部說︰「最近成日都腰痠背痛，成身都唔舒服，連出去玩都冇晒心情。」全哥問：「安仔，你開工之前有無做好熱身運動？」
安仔說：「咪講笑啦，開工前熱身？打波前做熱身就聽得多，每日返工都趕頭趕命，仲邊有時間做熱身呀？」全哥說：「我不嬲都會在開工前做足熱身運動。即使你身體再強壯及再年輕，唔做足熱身運動都會增加體力勞動時受傷嘅風險。」
安仔問：「嘩，熱身運動原來咁重要！咁應該點樣做？」
全哥答：「首先，我哋要重新認識熱身運動。熱身運動係指運動前嘅準備動作，目的係提高體溫同令身體及肌肉反應可以更靈活。熱身前應留意以下幾點：首要運動量應由小開始，逐漸增加；第二，熱身運動唔可以過分劇烈；第三，熱身應包括伸展運動及緩步跑。」
全哥續說：「除咗開工前做熱身運動，喺公餘時間，我哋都應該經常做運動鍛煉身體。如果能夠持之以恒，除咗可增強心肺功能，促進血液循環，更可以促進新陳代謝，防止脂肪積聚。身體夠健康，工作自然更得心應手。你知香港工作壓力大，做運動幫助消除工作及生活所帶嚟嘅壓力絕對係一個好方法。」
安仔道：「原來係咁，即係生活再忙碌，適量運動都唔可以少。由下星期開始，不如我哋放工一齊去游水同跑步啦！」
職業安全健康局
www.oshc.org.hk