政情：峯鴿求解凍失敗黨內選舉全面封殺

民青將喺本周六舉行會員大會，選出第五屆常委會。據了解，目前有三人競逐主席一職，包括白鴿黨創意媒體部部長黎敬瑋、尖東及京士柏社區主任朱子洛同九龍東社區主任葉梓傑；副主席亦有三人競逐，包括朱子洛、九龍東社區主任黃正峰同現屆副主席、大埔區議員區鎮樺。消息人士透露，峯鴿曾遞表申請角逐，但近日已退出選舉。

競逐民青主席被DQ 否認博解凍

峯鴿回覆查詢時確認已參選民青正副主席、港島支部部委同中委會，但前日就收到民青通知因為其黨籍已被凍結不能參加主席選舉，已取消佢嘅參選資格（DQ），而港島支部嘅有效提名名單中又無佢名，相信亦被DQ。佢話一直以為大家都會等中委會嘅結果，唔明點解會畀人DQ，但話尊重各委員會決定，否認為「博解凍」，只係想做番應該做嘅嘢，笑稱最多咪做個有議席嘅普通黨員。

據了解，黨中委會尋晚開會討論峯鴿申請參選豁免權，就算佢退出民青選舉亦唔等於唔討論。有中委會成員透露，峯鴿將來仲可以要求參選中委或支部，相信尋晚會一併討論，但為免「自打嘴巴」喺搶手機案完結前「解凍」峯鴿，評估放生機會低。

黨主席胡志偉喺中委會會議後回覆，話經過討論後，中委會認為應按章程規定處理，峯鴿正被凍結黨籍，所以無任何政治權利參加黨內任何選舉。咁講，即係中委會唔批准峯鴿有豁免權，亦即係全面封殺佢。

立會搶手機案完結前難再參選

雖然事隔半年，峯鴿早已按捺不住想博大霧求解凍，而由於民青主席必須為白鴿黨員，峯鴿強行參選變相迫令中委會要決定係咪解凍，如果唔解凍又畀豁免權就會令局面相當尷尬。睇嚟佢參選只係「項莊舞劍，意在沛公」，為求解凍而已，而喺搶手機案完結前，佢都冇機會染指黨內任何選舉嘞！